Heldu: ailegatu, oratu, nagusitu, etorri, gertatu…

Hau zen heltzea,

betierekotasuna arbuiatzea

zimurrak jostea

sagarrak egostea

hortzen arteko desira zatiak zotzez askatzea.

Hau zen,

besteentzat bizi eta gero, gutxiago espero izatea

hots zuria aditzea

etxea, haginak erori arau, husten ikustea

esku ahurretako erreketan igeri egin nahi ez izatea.

Hau zen,

mina eta ezina ezinbesteko errimatzat onartzea

grina ahaztuta, gorputza asetzeko larrua jotzea

hanka puntetan jarri gabe

sagarrondoaren adarrera ailegatu

fruta oratu eta

sugea irenstea.