aulkitxoari bultza eginez bularreko umeak paseatzen

ditugun amok

gurpilek lurraren kontra ateratzen duten hotsak

berdintzen gaitu

aldatu egin da pausoa luzatzeko genuen modua

betazpietan aintzira izoztuak

berrogei astean pilatutako hondakinak sabelean

ezpain ipurmasail bular puztuak kulunkan

Baby Jogger orgatxoaren heldulekuari eusten diogu

geure buruari

ukabilekin

aulkitxoari tira eginez bularreko umeak paseatzen

ditugun amok

begirada ortzi-mugan

bueltaka gabiltza

gure betebeharren zirkuluan

amagintzaren katean

fabrikazio xehean

pieza txikia moldeatu garbitu

marruskatu

araztu

tailerretik atera

kartoizko kutxan sartu

fragile seilua jarri

eta bermerik gabe mundura jaurtitzeko lanean