Lehen edoskitzean

pago bat ernatu zitzaidan bularrean

atzamarretan urkiak zabaldu

bihotzean ereinotza.

Orain baso batek zeharkatzen dit bizkarrezurra

bidaide eta lapurrak

xuxurlak eta beldurrak

dabiltzan basoa.

Eraztun berriek jantzi didate enborra.

Hau da bizi naizen zirkulua

zedarritzen nauen eremua.

Ustekabeko lekuetara

hegaldatu dira nire adarrak

lurjabetu sustraiak

eta hala ere badaki nire zurtoinak

noizbait erauzi egingo dutena.

Hedatzen eta askatzen naiz

sahatsa bezala lurrerantz

makurtzen bizitzaren aurrean.

Zure jaiotzak zuhaitz bat merezi zuen.

Ez naiz aizkoraren beldur.

Bestelako izuek zuhaiztu naute.

Orbela ari du.