marru egiten dut

basoa bezala gauean

ilun eta zabalik

estalitako egia honengatik

nire aluaren sumenditik

marru

ematera sortzera askatzera

bultzatzen nauen indar honekin

marru

nekeagatik eroritako bularrotatik

edaten duten bitartean

marru

bakarrik erditu ziren andreekin

eskatu gabeko umeak maitatzera behartuak

etxeari kateatutako zakurrak nola

marru

nire amatasuna sedimentatuz doala

egiten dut marru

ama izateaz damutu zaretenokin

izan nahi ez duzuenokin

mendeen pisua daraman harria zilborrean jiraka

marru egiten dut

munduan haur minetan ari zaretenokin

desiratzera behartu zaituztenokin

marru

ehunka urtetan gelditu gabe errekan garbitzen

eta ehunka urtetan zuen gorputzak goldatzen

eta ehunka urtetan azalak josten

mututu zaretenokin

marru egiten dut

glotisa itxi eta zabaldu itxi eta zabaldu

nire ahoan jotzen ari den orkestra honekin

marru egiten dut

oharkabean lotura horri eusten dion katebegia

bihurtu naizela ohartzean.