Gura nuke

jaiotza-agiririk gabeko itsasoarekin berritu

nire azalaren bide nekatuak

lurrik zaharrenarekin ezabatu

zuhaitz adarren eran

txorien ubera ukitu

dardaren neurri zehatza izan

airea moztu eta edan

uztarekin batera itzuli etxera, beti ezberdin,

gutxien uste dugunean

gatozelako bueltan

isiltasuna itzultzen hastearekin.

Gura nuke

hizkuntzari eskuez habia egin

ez balitzaizkit izen guztiak eroriko bidean.

Ezin itzularazi, ordea,

inoiz joan ez dena.

Hitzez oinez ikasi

gura nuke.