Aurkibidea
EZIN AHAZTU NOR NAIZEN
AZKENAK IZATEA
Libre izatea ("Y" belaunaldia)
Bi aulki eta mahai bati begira
PAPEREKO LAGUNAK
Vladimir (Maiakovskiren poema batean)
Lau post-it 21. mendean poema liburu bat idazteko
GEZUR ETA HARAGI
BARRURANZKO BIDAIA
ATZERA LUR HARTZEN
KOORDENADA BERRIAK
Aurkibidea
EZIN AHAZTU NOR NAIZEN
AZKENAK IZATEA
Libre izatea ("Y" belaunaldia)
Bi aulki eta mahai bati begira
PAPEREKO LAGUNAK
Vladimir (Maiakovskiren poema batean)
Lau post-it 21. mendean poema liburu bat idazteko
GEZUR ETA HARAGI
BARRURANZKO BIDAIA
ATZERA LUR HARTZEN
KOORDENADA BERRIAK
HORRELA MINTZO DA ZARATHUSTRA
Oraindik makurtu gabea zara, aurpegian nabari zaizu.
Bizarra egin berritan zaurien markarik ez duzu bistara,
begiak husteko biltegiak dira eta ez dute gainezka egin.
Dena ondo doakizula dirudi, zorteko zara, ezta?
Dezepzio handirik ez, ilusioak osorik, betiereko haur
gurasoen ondoan, diru falta gabe, mundua ezagutzen.
Baina beste norbait izan nahiko zenuke.
Beti goiz da mila zatiak inori entregatzeko:
oso, bat eta bare baino hobe txikituta, asko, bizi:
edan besteren ezpainetatik, ezezagunen ondoan esnatu.
Urteek aurrera egin ahala jendea damutu egiten da
egin ez dituenez, ez makurtu artean ustez egindakoez:
ezagutzen ez duguna nahi dugu, galdu duguna
berreskuratzea desiratzen dugun adina indarrez.
Gure buru-gorputza nekatu egiten da zaharrez,
zabaldu behar ez zuen ate bat zeharkatzen du,
engainatu egiten da, engainatu egiten dute,
eta lehengoa nahi du baina berria ere bai,
emaztearen kontsolamendua eta maitalearen hankak.
Begira niri... zu baino hamabost urte eta
hogei mudantza makalago; etorkizuna joan zait,
amodioa ukatu dut, nahi adina ile ukitu,
gosea asetzeko jan, nireaz beste egin dut,
eta besterenaz ere bai. Baina dramarik ez,
entzun egidazu: gauza onak kasualitatea dira
eta ez lege edo gertakarien ondorio logiko.
Atsekabe eta plazer nahastura, erdiz gorroto
erdiz amodio, formula kimiko bat da; ez arau eta
ez fede, dena barne bulkada: zure bihotza
ez dago buruan, zure burua da bihotzean dagoena.
Ez zara lehena. Ez zuten zerbait aurkitu nahian
galdu diren asko ezagutu ditut zure aurretik.