14. Hiru aste pasa dira

 

 

(Urrunean tutak entzuten dira eta gurpilen soinua harrixken gainean. postaria heldu da. postariak besoa zauritua du. Gutun batzuk baditu eskuan. beñat agertzen da, gau txarra pasa du iduriz.)

 

postaria: Eguerdi on.

 

beñat: Baita hiri ere parte on. Biera bat?

 

postaria: Ez, milesker!

 

(beñat sukaldera doa. Bidean postariak luzatutako gutunak hartzen ditu eta bazter batean uzten. postaria ozen mintzo da.)

 

postaria: Uf, urria izateko, ze beroa! Ortzantza fitexko. Gutun ziurtatuak badituk hor. Sinatu behar duk.

 

beñat (sukaldetik, off): Ura?

 

postaria: Ados!

 

beñat (sukaldetik,off): Ricarrarekin gustua emateko?

 

postaria: Doi-doia!

 

(beñatek basoa luzatzen dio eta biak jartzen dira.)

 

beñat: Besoa hobeki?

 

(postariak besoa altxatzen du.)

 

postaria: Badoa. Lanean berriz hasia.

 

beñat: Emaztea?

 

postaria: Hobeki. Pena dik ez baitidak zangoan eman tiroa, hilabetea pasako nian etxean.

 

beñat: Barka nezak. Zinez, barka.

 

postaria: Badiat basurde aire bat edo zer?

 

beñat: Ez, ez, ez duk hori. Tentsioan nindian eta tiroa eskapatu zaidak. Orain, istripu gutti: eskopeta errekara bota diat. Basurdeketa, ni gabe! Beganoa nauk!

 

(postariak irri egiten du.)

 

postaria: Entzun duk Edurne desagertu zela? Badakik, auzokoen alaba...

 

beñat: Ba, ba. Ez zidatek hitzik ere egiten hunat etorri direnetik.

 

postaria: Bi egun ari dituala bilatzen, telebistan pasa duk eta dena. Bere telefonoa ez zuela hartu, bestela berehala harrapatuko zitean.

 

beñat: Ba, fitexko itzuliko duk aita-amen etxera.

 

(postariak egunkaria luzatzen dio eta beñatek irakurtzen du.)

 

postaria: Ikusi duk Janbattitt Laborantza sailburuarekin? So egin ezak, hor, matelak gorri, Donostian. Eskukada ederra. Zer ekarriko duen horrek... Ez zakiat. Aita untsa duk?

 

(beñatek segitzen du egunkaria irakurtzen.)

 

beñat: Aita? Ezin hobe. Baionako ospitalean sartu orduko erizain bat ausiki dik. Bi aldiz eskapatu duk, eta ostatuan harrapatu ditek poteoa egiten. Aña desesperatua duk, Iban hotelera joatekotan... Bizipoza. Patxik lortu omen dik haren kalmatzen. Ospitalera eraman dik berriz, baina noiz arte...

 

(postariak hurrupa batean bukatzen du ricarra, eta altxatzen da.)

 

postaria: Joan behar diat. Sinatzen dizkidak paperak?

 

beñat: Ze paper?

 

postaria: Gutun ziurtatuenak. Sinatu behar dituk errateko ukan dituala.

 

beñat: Nondik heldu dituk?

 

(postariak hartzen ditu berriz gutunak.)

 

postaria: Bankua, uxerra, bankua, ez zekiat zer eta... Auzitegia.

 

beñat: Poesia handia.

 

(beñatek ez ditu ireki nahi, baina jakin nahi du zer baden barnean. postariak idazluma luzatzen dio.)

 

beñat: Ez, ez. Irakurrak eta gero aski duk erraitea ez nintzela hor. Hola prozedura ez ditek martxan jartzen ahal.

 

postaria: Espres ari haiz?

 

beñat: Bate.

 

postaria: Baduk burutik? Ez diat lana galdu nahi nik. Eta badiat ohore bat, ene ofizioa ofizio seriosa duk, hi!

 

beñat: Kartetan trenkatzen diagu? Irabazten badiat irakurtzen dizkidak eta ez nauk ikusi.

 

postaria: Eta nik irabazten badiat?

 

beñat: Ez duk gertatuko.

 

postaria: Nola?

 

beñat: Galduko duk.

 

postaria: Bota ricarra.

 

(Sukaldera doaz.)