11.

 

(abuela isildu, txaldatxur zaharrak makila modukoak alboan utzi gero, banan-banan erritmoa jarraitzeari utzi eta kanpamentua egokitzeari berrekiten diote besteek.)

 

alpontso (zeru aldera seinalatuz, urruntasunera, kezkaz): Zer da hori? Misil bat?

 

txaldatxur: Cayuela? Cayuelak eraso berriro? (Borrokarako prest) Azkar! Goazen granadak jostera, azkar!

 

abuela: Egon, maitea, egon… nekatuta zaude, oso nekatuta, ez duzu gogoratzen?

 

txaldatxur (oldarkor): Nekatu eta nekatuondo… zer inporta du horrek? Cayuela bizirik dago, zer uste duzue zuek? Berak irabazi zuen gerra, bizirik dago!

 

abuela: Egon, egon… Egon, maitea, ez duzu gerra inoiz bukatu behar, ala?

 

txaldatxur: Zer bukatu eta zer bukatuondo…! Gerra ez da bukatu! Inoiz bukatzen al dira gerrak? Gerra ez da bukatu!

 

ailem: Injustiziak, inoiz bukatzen al dira? (Erantzunik ez) Inork ez daki horri erantzuten?

 

      (abuelak txaldatxur lasaitu du azkenean. Zeruari begira denak.)

 

santi: Misila? Oso motel ari da… Misila balitz jota egongo ginatekeen honezkero.

 

ailem: Misilak jo gabe ere, seko jota ez al gaude honezkero?

 

santi: Jota bai, jota-jota ez. Ez? Ala jota-jota gaude?

 

alazne: Ez, satelite bat da, nik uste. Ala ez da satelite bat?

 

alpontso: Satelite militarra?

 

santi: Militarra, militarra… Ba al dago akaso militarra ere ez den zerbait?

 

abuela: Eta izarra izango balitz?

 

alazne: Izatekotan, jaio berria izango da, txiki-txikitxoa, unibertsoan ibiltzen ez dakiena oraindik, eta estropezuka dabil horregatik, lurrera erortzeko puntuan beti, ez duzue uste?

 

santi: Aizue, ez da edonon erortzen den horietako bat izango?

 

alpontso: Ez zaigu gainean eroriko, ezta?

 

alazne: Lepoa ez egin badaezpada…

 

abuela: Beldurrik ez izan, maiteak. Errege Magoak gidatu zituen izarra izan daiteke, zergatik ez? Ez litzaiguke gaizki etorriko bidea erakusteko.

 

santi (kexuz): Abuela…!

 

abuela: Zer, bada, maitea? Utreran, ume nintzela, horretan sinesten nuen, gure amak horrela kontatzen zigun, Egiptotik edo zetozela… Gainera, zergatik ez? Hain misteriotsua da munduan gertatzen den guztia…

 

santi: Misteriotsua? Ez al da izango ezezaguna gertatzen zaigula?

 

      (Inork erantzun ez. Norberaren zereginetara bueltatzen dira.)