ANHAUZEN
Ipar Euskal Herrian
teatroa amesten dutenei
zabalduko dira xendrak oinetan
urrats zaurituen izerdia dastatuko du gauak
aurrera bisaiak!
oihukatuko du jendeak
aurrera ezjakinak!
irudi bete hots
aurrera zalantzak!
beldurrak amaraun
txaloek errealitatea zaurituko dute:
biztanlerik gabeko gauean dena da posible
hizkuntza betea barne
dantza egin dezagun samina estutuz
dantza egin dezagun itxaropena gaurkotuz
jauzi baten arimak finkatuko du gaur
urtaroen salneurria
jauzi baten arimak estutuko du
galeraren bidea
txaloek errealitatea zaurituko dute:
bihotza ukabilean kabituko da
eta taupadak berriz
ahoan
© Oier Guillan