AKUILUAK
batzuetan belaunak uzkurtzen zaizkit
euritan biltzen haginak
batzuetan zalantzak leporatzen dizkit
isiltasunak
akuiluak asmatu sortu pentsatu
irudikatu nahi nituzke orduan
akuiluak dira
leporik aurkitzen ez duten masailak
ideia hautsiak
umore tristeak
akuiluak dira
aldarrikapen ezinduak
manifestu otzanak
izen abizen etzanak
akuiluak lotsaren bidean
abandonatutako argazkiak
mozkortiaren gezurrak
politikoaren egiak
akuiluak espaloiei neurria hartzeko
akuiluak ziurtasunak zartatzeko
akuiluak maitasunik sendoenak zauritu eta
maitale lehertuak zelatatzeko
akuiluekin jakin nezake
non biltzen diren isilpeko gatazkak
non jaio diren
garaipenak ordezkatu nahi dituzten
lore akastunak
akuiluak behar ditut minutuek oka egin ez dezaten
akuiluak behar ditut sinesmenak gaitzetsi eta
betileen ertzean konfiantza gailendu dadin
akuiluak zaborrarekin musikarik ederrena egiteko
irribarre metafisiko batekin
ile galduak behinola existitu zirela oroitzeko
akuiluak xumeki eta militanteki
zoriontsu izaten ausartzeko
© Oier Guillan