Poesia kaiera
Poesia kaiera
2000, poesia
64 orrialde
84-95511-07-X
Itxaro Borda
1959, Baiona
 
2012, nobela
2009, nobela
2007, nobela
2005, nobela
2001, nobela
1998, poesia
1996, nobela
1996, nobela
1994, nobela
1991, poesia
1986, poesia
1985, nobela
 

La porta oberta en el cel, i aixo

I

herri hau aipatzen diguten aldi oroz

elizetako

barne mukuru beteak erakusten dizkigute,

        emazteek beherean

        «zuk kentzen duzu munduko bekatua»

        eta gizonek galerietan

        «urrikal jauna»

        kantatzen dutela.

        «emaguzu bakea» deiadarkatze

bakoitzean irri bat hiltzen da

hemengo jendeen ezpainetan.

 

II

requiem dio haizeak.

        udako lantzurda maltzurrik

        eskaintzen ez duten

        lurrak ez zaizkit gustatzen.

        nere azken egoitza ankerra

        josiko duketen

        xurxuriak laztantzen ditut.

requiem dio haizeak.

 

III

arrosaren gorria

minberago da

gauez egunez baino

 

euriaren beldurra

bustiago da

gauez egunez baino

 

haragiaren ikara

zehatzago da

gauez egunez baino

 

haserrearen hatsa

erreago da

egunez gauez baino

 

 

IV

estatistika ofizialen arabera

euskal herri barnean

bizidun haina ardi gehiago dago

        horregatik

        gasna

        urre xuria da.

 

        eta nik gasna ez dut maite.

 

estatistika klandestinoen arabera

euskal herrian

ardi haina polizi gehiago dago

        horregatik

        bakea

        segurtatua da.

 

        eta nik bakea ez dut maite.

 

V

ingurukoen aho arras zoriontsuetan

neronen bakartasunaren eremu

desolatua

izar dezaket

 

no woman’s land erraldoia

 

VI

mugaz bestaldean dago

bizitzeko estakuru ahularen marka

mugaz bestaldean dago

etsitzeko arrazoin azkarren bidea

mugaz bestaldean dago

ebatsi nizun musuaren oroitzapena

 

mugaz bestaldean dago

dena

eta deusik eztago

 

VII

gauero

hiri berdinaz

amets dagit.

gauero

zure itzalari

loturik

kexu trakesak

eztitzen ditut.

gauero

metroko arroiletan

kantu zaharren gisara

maite zaitudala

errepikatzen dizut.

eta

zuk

gauero

kaioletan salgai dauden

txori exotikoen

ikustera naramazu

erranez:

        begira zer

        ez dugun

        bilakatu behar.

         

w1986

Musika: Danba