Poesia kaiera
Poesia kaiera
2000, poesia
64 orrialde
84-95511-07-X
Itxaro Borda
1959, Baiona
 
2012, nobela
2009, nobela
2007, nobela
2005, nobela
2001, nobela
1998, poesia
1996, nobela
1996, nobela
1994, nobela
1991, poesia
1986, poesia
1985, nobela
 

Itsasoaren bihotzeraino I

Itsasoa laño dago

baionako barraraino

nik zu zaitut maiteago

ilargiak gaua baino

 

barda arratsean doluaren argian kartzelaren leihorra

heriotzaren aitzur bekaitzak setiatu zuen betiko

eta marinela eta marinela urruneko munduez

urruneko munduez oraino ametsetan.

barda arratsean marinelaren bihotza arta eskasez

itsasontzi krudelak bahitu zuen burdinaren bahian

eta marinelaren arima urmaeletarik iratzarri zen oihuka

heriotza gaindituko zuen argi-urrakoari deika

—hego haize maitekorra nondik buhatzen dun

urruneko munduez oraino ametsetan?

 

barda arratsean ekainaren bezperan kostalde hotzean

malkoen haguna begietarik dilindan uhainak dudakor

eta marinela eta marinela gau-minaren haiduru

bihotzaren itsaso ebakiaz ametsetan.

barda arratsean mendekuaren zama behere-lainoetan

esku ahurra tinkirik eta soakoa zorrotz

itsasoaren bihotza

eta marinelarena biak

iraun nahiaz beharraz premiaz kantatzen.

 

izar xuriz mila dago

iparretik hegoraino

nik zu zaitut maiteago

ilargiak gaua baino

 

w1998