HEMEN

xede jakinik gabe zoaz

Victor Hugo kaleko espaloian zehar

zubiaren bestalderaino

barnean bizi-irrika duzula

hala eta guztiz ere

egunen joanak

harantzago ezartzen zaitu

honantzago beharrean

noiz edo noiz

hegoaldera egin guran

minberaz gogoratuko duzu

iparraren diosala

aiher zara

eta lehenengo aldiz bada ere

bide honen helmuga bilatzen duzu

harresi urratuen bestaldean

gautze ororen distantziak laburtu ondotik

benetan esatea nahi baduzu

hemen ez duzu

bilatu nahi duzun hori aurkituko

itxaroten duzun horren zantzurik sentituko

hemen ezinak ezinago dira

bakardadeago bakardadeak

© cc-by-sa Mikel Ibarguren