APIRILAREN IRAGARPENA

egunak argia erein du goizean goiz

ezpainak hutsetik ernatu dira apirileko aldirietan

izarazko bizkarrak urratu nahirik

zure ahoaren mindurak

nire sentimenduen zirrara eragin du

zugan duzun emetasun guztia

nire sabelpean joaldun dabilenean

maiteminez duindu ditugun desirak

gaizki itxitako poroen zaurietan larrutu dira

gure haragi biziak irekiz

apurka deseginez doazen itzal bi baino ez gara

isiltasunaren iragarpenean errotuz

eta zure gorputza amaitzen den lekuan

hasten da nirea

hitzorduak azkentzen diren teilatu zulatuetan

nire ondoan zaude baina urrun hala ere

kaosaren teoria guztien gainbeheran

beti geldituko da

musuen higaduran berpizteko aukera

© cc-by-sa Mikel Ibarguren