GOGOAN DUT

jasandako guztia jasan ondoren

gau zuriaren ostean amodio eske

etorri zen zure soaren galarrena

ez zen desira ezpalduen hutsunea soilik

aspaldian sentitu gabeko barne dardara izan zen

ozeanoak ur tanta zirudien begiaren sakoneran

leihora egin genuen begiraden bila

eta albo-kalteak zerrendatu

baina mezu galduen arrastoak baino ez genituen aurkitu

ezpain anonimoetan kresaldurik

ez genekien nondik agertu zen ilargiaren aztarna

non ernatu zen goiz alba

izateko arrazoirik bazuen geroak

mindurak noiz arte iraungo zuen

izugarria zen ilunabarraren hurbiltasuna

euriaren usain hezea

hodeiak doluminez zetozen gure gainera

horixe baino ez dut gogoratzen

horixe eta zure ahots zilarra utopiaz galdezka

© cc-by-sa Mikel Ibarguren