BILUZTEN

bizitzaren alde banatan ezarri gaitu barnemin honek

ilunduran arrakala areagotu egin da

eta hitzarmenik gabeko desioak aldezten ditugu

arnasaren epelera egiten dugun bakoitzean

berba galduaren ondoren isiltzen ari dira

garai bateko kantuen oihartzunak

batzuetan egun honek beste egun bat ematen du

oraindik orain olgeta berrien bila gara hasiko

handik edo hemendik sentimendu sakonenei jarraiki

badakigu bestelako izenak asmatuko dituztela

bularrotan gorde dardarizoak berpiztuko direla

etorriko diren inbernadei eusteko

helduko dira maileguzko udazkenak

hosto gabetzen hasiak

laztanentzat lekua eginez

ahazten jakiteko memoria txarra behar da zinez

horregatik zauzkat gogoan

orbel galduaren antzera gal ez dadin akordua

horregatik zaitut biluzten hostoz hosto

azalaren muinera heldu arte

© cc-by-sa Mikel Ibarguren