ZURE ITZALA

amesgaiztoak burkoetan ito ostean

espazioak bere lekuan ezarri ditu gauzak

aurpegirik ez duen kristal hutsa da ispilua

hormaren negatiboan agertu da zure siluetaren itzala

bihotzaren alde honetan nago oraindik

auzoak urratsak galdu ditu

zurezko eskaileretan behera

eta aratza da ekaineko lehen argi bizia

egunaren lehen ukitua

begietan lanbroa duenarentzat

iratzargailu digitalean zazpiak dira

amaitu da nire loaldia

gorputz berean itzartu naiz gaur ere

© cc-by-sa Mikel Ibarguren