EGUNEN BATEAN

egunen batean

bertakoak izango ez garenean

aurrera egingo dugu harat-honat

noraino hel gintezkeen jakin gabe

ahalegin hutsalduen bermeak aurkitu ezinik

itxaron ezinezko abiada honetan murgildurik goaz

bertakoa ez balitz bezala so egiten diogu bizilagunari

amaren galtzorratzetan gara josten oraindik

edo haurrak esnatuko diren beldur lokartzen

goizeko ordu bietan

laneko arropak erantzi ostean

besterriratzen zara nigandik

ele astunen eraman zaila barneraturik

atzenduak ditugun lorbideak berreskura genitzake

begirada zulatuetan babesteko

soldaduak lubakietan bezala

inolako pasahitzen beharrik gabe irekiko ditugu ateak

bata bestearen atzetik joango gara orpoz orpo

kale galduen iragana gogoratuz

eta bertakoak ez bagina bezala egingo digute adio

Zubimusu auzunetik Kale Okerrera egitean

Kale Erdira sartuko garelarik

gure ahoez haraindi egingo dute kale-izenek

gure zainek Bidasoatik Urumeara egingo dute

handik Oriara eta azkenik Urolara

jendez hustu zaizkigun barruak

habitatu beharko ditugu ezinbestez

ez gara etsituko urruntasunaren alokairu hauetara

ez gara ohituko esamesen zurrumurruetara

ez dugu hezur ahulagoetan ezarriko gorrotoa

ez dugu gezur gordinetan ezkutatuko oroimina

zure oroitzapenean gure leku-izenak

bizirik dauden artean

bertakoak izango ez garen

egunen batean

© cc-by-sa Mikel Ibarguren