GEROA ASMATZEN

itsasorik ez den lekuan itsasoa ezarri

gorputzik ez dagoenean beroa asmatu

edo ur tanta izan harrien muin idorrean...

ez dut uste asmamen hutsez bizitza osa daitekeenik

irudimenak zertan mamiturik ez badu ahitu egiten da:

sarri nahi izaten dizut egin aitorpen intimoa

eskuak zeruko zurajean jarri goizeko argiaren kontra

amoroste umetu baten soslaia

behin eta berriz osatzeko ekinari lotuz

ezkerrekoaren ukimenak badaki eskuin eskuaren berri

gosariko ontziak jaso lanbasa bihurritu

eta norbaiten bila noa

gaurkoa ezer ospatu gabe igaroko da

baina zure ondoan har nazala minenean gauak

ez dut loa galdatzen jolasa hain gutxi...

ikusezin bihurtu aurretik hala ere pare bat hitz

—gogoeta eta ekintza—

astean bitan asmatu behar nindukezu oraindik...

elkar asmatze honekin aspertu bazara baina

asma ezazu beste jende bat gu baino hobea

doi-doi egunei zutunik eusteko behar duzuna

—esan gabe doa— ahal banu

berriro atzera so egitea galaraziko nizuke