GABRIEL ARESTI BIZIRIK DA

Batzuen arabera Elvis bizirik dago

eta faltsua da 1977ko abuztuan

Graceland-en hil zena.

Bob Dylanek ere badaki hori,

nahiz eta ezkutuan mantentzen duen.

Jim Morrison ez omen zen zendu,

bizirik da oraindik, hor, hortxe bertan.

Baina esango nuke hala balitz

enteratuak egongo ginela honezkero.

Nik, ordea, badakit

Gabriel Aresti bizirik dela.

Gabriel Aresti astelehenetan

Batasunako militantea da,

ETArena ez zaio guztiz ondo iruditzen baina

Euskal Herriaren independentziaren alde dago.

Astearteetan PSOEkoa da, EEko militante ohia,

ez du jada Aberri Egunean xanpainik edaten.

Asteazkenetan EAJkoa da,

ezin dira horrenbeste txinatar oker egon beti.

Ostegunetan EBren alde egiten du,

Madrazo ez zaio gehiegi gustatzen

baina zer egingo zaio,

bera beti paratuko da gizonaren alde.

Ostiraletan EAk betetzen du gehien,

ez daki sozialdemokrazia klasikoaren

edo hirugarren bidearen alde egin behar duen.

Larunbatetan noizean behin Aralarrekoa,

baina batez ere PPkoa,

sekretuan mantentzen duen arren.

Eta igandeetan,

igandeetan Gabriel ez da mezetara joaten.

Igandeetan libertarioa baita,

eta horregatik esaten duzue

Gabriel Aresti hilda dagoela.