JOSEMA IRUTAGOIENEK

TXEMA KORTESI,

OIHENARTEK ESANDAKOA GOGOAN

        ( d+l, i )

Heltzeak, berrogeietara hurbiltzeak,

esan nahi dut, badu bere zera,

azkenean jende bilakatzen zara.

Ez zara gazte aurrera,

ez duzu etorkizuna espera,

eta hausteari dagokionez

ez badituzu eginbeharrekoak egin

malo!

Zahar ere ez zara,

ez zara iraganean bizi,

eta nostalgia ez duzu lagun,

nahiz gero eta maizago

bereak egin.

Jendea baino ez zara:

irriki izandakoa

hau baino ez zen.

Bukatu dira promesak,

ez esperatu, etortzekoa,

puskak biziz, hementxe duzu.

Nola definitu, bestela

igande goiz eguzkitsu hau

kazetak, kafesnea,

aspaldiko partez norbait

aldamenean, promesarik gabe,

gezurrik gabe?

Hil arte bizi

diozu asteleheneko kontzientzia

txarrarekin errerik.

Enfin puskak bildu

egunero ohera aurretik

beharrezko zaizun ariketa,

bildu eta ohera eraman

eta asteartean gaude jada.

Too young nostalgiarako,

too old, asteazkena hemen da,

melodramarako.

Promesarik ez dago.

Etortzekoa

ostegun eta ostiralerako

(horrela en plan grande)

etorria dago.

Bizi puskak bizi,

beroketak behar dituen ariketa,

ezen laxatu behar baitu

bihotzak burua,

buruak bihotza,

bihur daitezen, malkemal,

bizi puskak puska biziak.