Bide egiteko kanta

 

Marinarentzat

 

Ene ontzira igo nahi al duzu?

—Brioleta liliz mukuru dabil!

goazen urrun, hemen uzten

dugunaz nostalgiarik gabe.

 

Goazen urrun nostalgiarik gabe

—eta bi garate, hiru garate.

Etorri, etor zaitez gure ontzira,

belak zahar, zerua zabal.

 

Beso bederak arrauna baduke

—Eta lau garate, bost garate!—

gure begiek, izar ibiltariak,

mugak ahantziko dituzte arras.

 

Martxoko haizeekin abia gaitezen

eta bihotz inarrosien hedoiekin.

Bai, hogei garate, berrogei garate,

ilargia banderatzat ukanen dugula.

 

Atzoko sorginak, gaurko sorginak

itsas betean aurkituko dugu elkar.

Bizitzak, dantza baratzekoi baten

antzera denetan distiratuko du.

 

Uhin gaziaren larruan

bostehun garate, mila garate.

Arrastirian galduko ditugu kontuak.

Elkarrekin jabetuko gara gauaz.