GIZON BATEN EMAKUMEA

Gizon baten ametsa

puta bat da urrezko hortzekin

eta izterreko galtzari batekin,

perfumatua

bekain faltsuekin

errimela

belarritakoak

kulero arrosa argiak

salami-hatsa

takoi luzeak

galtzerdi are luzeagoak urratu arin-arin

batekin ezkerreko galtzerdiaren atzealdean,

apur bat lodia,

apur bat mozkorra,

apur bat ergela eta apur bat txoroa

txiste zikinik kontatzen ez duena

eta bizkarrean 3 garatxo dauzkana

eta musika sinfonikoa

gustuko duelako itxurak egiten dituena

eta astebetez egongo dena

astebetez baino ez

eta sukaldatu eta harrikoa eta larrua jo

eta txupaka egingo duena

eta sukaldeko behegaina gogor igurtziz garbituko duena

eta erakutsiko ez duena seme-alabatxoen

ezelako argazkirik

ezta hitz egin ere senar ohiaz edo senarraz

ezta esan ere zein eskolatan ibili zen edo non jaio zen

edo zergatik egon zen kartzelazuloan azken aldian

edo norekin dagoen maitemindurik,

astebetez baino egongo ez dena

astebetez baino ez

eta zera horiek guztiak eginda aldegingo duena

eta sekula santan

itzuliko ez dena

komoda ispiludunaren gainean dagoen belarritako

bakar horrentzat.