DAKIDAN GUZTIA

Dakidan guztia hauxe da: beleek ahoa

            muxukatzen didate,

zainak katramilaturik daude hemen,

itsasoa odolezkoa da.

Dakidan guztia hauxe da: eskuak tenka jarri dira,

begiak hertsiak ditut, belarriak hertsiak ditut,

zeruak atzera botatzen dit garraxia.

Dakidan guztia hauxe da: sudurzuloetatik

            ttanttaka darit amets-emaria,

zakurrek biziki dastatzen gaituzte,

            ergelak irriz karkaraka dabiltza,

erlojuak hildakoez mintzo dira tiki-taka.

Dakidan guztia hauxe da: nire oinak min dira hemen,

nire eleak liliak baino ezdeusagoak dira,

            nire eleak gatzatu egin dira hemen:

beleek ahoa muxukatzen didate.