BESTEREN LARRUAN
1
Gizon eta emakumea
erantzi duzuen
ar eta emea zarete.
Azalera berri bat
arakatzen dute atzamarrek
bestearen haragi gose.
Ez daki zuk zer nahi duzun
baina zure hankartean
amaren sabelera itzultzen saiatuko da
erritmo kolpekarian.
2
Haragizko lorea
laztantzen duzunean hazten da
zure zauritik barrura egiten duen sugea.
3
Amodioa deitzen duzuen
ezkutuko borroka horretan
bi haragiren jotzea ez da zuen min
ukitzen ez diren gainerakoena baizik.
4
Bakarra zinela esan zizun gauean,
baina bat gehiago zara etzan zarenean.
Ohearen alde hori beste batek hartu zuen lehen
eta haren mamuak zurekin egiten du lo hemen.
Zerk huts egin zuen orduan?
Orain zu zaude bestearen lekuan.
Izan zen gezurra? Izan zen beldurra?
Noiz galdu zuen besteak bereganako fede apurra?
© Jon Benito