AINGURAK DENBORETAN
Etorkizuneko irakurleok, hara hor
izan nintzen idazlearen lehen liburua,
ausardiak eta ilusioak egin zuena
(ez nuen lotsa apur bat ere izan?).
Zuek handinahia ikusiko duzue,
mundua kontatu nahi nuen nik.
Zer zen aingurak erraietan sentitzea
ez bazen hitzen zarata hura
lurrera lotu eta zerura begirarazten ninduena?
Liburutegian Benedettiren
bildumen ondoan ikusten dut orain
eta burua makurtzen dut damuz.
Poesia ez nuen nik hil,
hark zauritu ninduen larriki.
© Jon Benito