AITA
Handia izan gabe
duena ez da txikia,
txikia izanda
zerbait du handia.
Nirea balitz harro nintzateke
eta nirea da,
baina orduan
zerk egiten du karranka?
Haserretzen denean haserretzen naiz.
Ezerekin itotzeko joera eta
gauza txikiei garrantzi gehiegizkoa
ematea hartu dizkiot.
Bere odoletik nator.
Etxeko labanarekin
egin nuen lehenez bizarra:
aitarena da nire lehen zauria?
© Jon Benito