Bildumaren zerrendara itzuli Idazle beraren beste lanak

LIBURUARI BURUZKO
KRITIKAK
EROSI LIBURUA
E-BOOK FORMATUAN

 


 

GU, JENDEA

 

 

Kokarekin burua galdu duen jendea,

gauero beheko tabernak ixten dituena,

behin galdu eta loa berreskuratu ezin duena.

 

Gu ez garen

gure jendea.

 

Hautsi eta osatu ez dena,

berriz hasi eta berriz porrot egindakoa,

nazkatua, eroria, ezindua.

 

Gure antzekoegia

beste izateko.

 

Neskalagunak eta familiak bazter utzi duena,

mundua bere baitan daramana,

akastuna, kulpaduna, zaurgarria:

errenditzen ez dena, baina

hobera aldatzeko itxaropenik ere ez duena.

 

Gauzak behar bezala joan ez balira

gu geu ginatekeena.

 

Federik gabea,

minak apurka jandakoa.

Mamuen aurka borrokatzen dena,

ansiolitikoekin ezindua.

Ohetik jaikitzeko indarrak galdu dituena,

beldurrari beldur diona.

Eszeptikoa, mesfidatia, damutua.

 

Gu eta gure jendea.

 

 

 

© Jon Benito

 


www.susa-literatura.eus