BI AULKI ETA MAHAI BATI BEGIRA
1
Lau hanka eta bizkarraldea.
Ezer gehiago ez.
Pertsonen zama,
bere iritzi eta zalantzekin,
sostengatzeko nahikoa.
2
Plastikozkoa, egurrezkoa, zumezkoa.
Diseinuzkoa, merkea, propagandakoa.
Berdin dio, ezta?
3
Neurri egokiak ditu
proposamenak aurkezteko.
Orekari eutsi eta gutxieneko distantziak
zaintzea ezinbestekoa du:
ez gertuegi berriz elkar jotzeko,
ez urrunegi gero ezin besarkatzeko.
4
Aulkiak ez daki taktikaz,
aulkiak ez du hitz egiten,
aulkiak eutsi egin behar du.
Mahaiak batzeaz daki,
mahaiak entzutea dakar,
mahaiak akordioa nahi du.
© Jon Benito