Castletowneko testamentua

Bihotz Izoztuen Herrian

ez da egurrik falta sukaldeak berotzeko,

ezta ikatzik ere parriletan okela samurtzeko,

baina nekez aurkituko duzu

gogoa berotuko dizun ahurrik

edo haragia samurtuko dizun hatzik;

Bihotz Izoztuen Herrian

bada amets ederrik darionik,

eta baita egindako ametsen damuaz

patsa mingotsa isurtzen duenik ere.

Bihotz Izoztuen Herrian

amuarrainek ezin dute jakitunen hitzik erabili

isuri toxikoak salatzeko,

hitzen pisuaz hondoratu eta

errekan gora joan ezinik geratuko ez badira;

Bihotz Izoztuen Herrian

gauak egunaren uzta bildu nahi izaten du

ordu txikietako irrati-esatarien ahotsean.

B.I.H.an gudak suntsitu gabeko basoak

ugariak dira oraindik,

baina inork ez du aizkorak arboletatik

atera zezakeen tablarik nahi;

B.I.H.an ez dago aditurik

trenaren azpian hildakoak

istripuz erori direnen eta

afektibitate ezak bultza dituenen

artean bereizten dakienik.

B.I.H.an badira

ahantzi ezin diren gauak eta

erraz ahanztekoak izango ez diren gauak;

B.I.H.an amonek Emile Zolaren liburuak

hostogabetzen zituzten beheko sua indartzeko,

anartean irakurtzen ez zekiten biloben eztairako.

B.I.H.an munduaren amaiera

Aratz-Erreka moduko herri batean dago,

erromatarrek Fisterra seinalatu arren:

bertan bukatzen da kaminoa eta kitto;

B.I.H.an bozgorailu erraldoietatik

jaurtitako heavy musikaz erortzen dira

udazkenean hosto durduzatiak.

B.I.H.an ez zioten Vivaldiri utziko

arrabita bat egitearen estakuruaz

behar zuen zuhaitza botatzen;

beleentzat gordetzen dira makal beltzak,

bero saparen erreminean haien itzalpean

babes daitezen.

B.I.H.an ez da erraza

ekaitz erauntsien astinaldietan

babeserako Castletownik aurkitzea,

baina oraindik ez da falta

amesten dugunaren existentzia balizkoan

sinestea bidezko dagien sorgintasunik.

B.I.H.an itxitako lantegien tximinia hilek

langabetuen haragian balek irekitako

hodiak dirudite,

bizitzaren itxaropena aberria ala hilaren

artean borrokatzen den bitartean.

V I.H. birusaren izan bera dauka B.I.H.ak,

eta txanpon bakarraren bi aldeak izan daitezke

Filologiako irakasle handiek siglak

homologatzen badituzte bederen,

eta ez baten edenarentzat

ez bestearen ifernuarentzat

dute aurkitu txertorik arratoiek.

Eta horrela,

esan nahi genituenak isilduz eta

isildu behar genituzkeenak esanez,

bizi gara Bihotz Izoztuen Herrian,

bihotzei elikadura icebergen zain urdinetatik

heltzen zaien herrian,

bizitzak heriotzaren antz sarriegia duen

herri berberean.

w1996