Apokalipsi berria

Hogei litro gasolina eraman zituzten atzo,

dio gasolindegiko mutikoak;

kezko tunel batek irentsi du bakea,

zirriborratu zuen poetak;

tren ero baten gidariak dirudite, aurpegi

estalkiak damaien... dio irratiak;

4.200 langile, 4.200 familia kalerako arriskuan,

idatziko du kazetariak;

alkandorak lapurtu dizkidate eskaparate hautsitik,

salatu du dendariak;

Karrantzako zubia mozturik daukate,

informatzen du Trafiko arduradunak;

krisia beti betikoek ordain ez dezaten,

kaleratu dira institutuak;

denontzat akordiorik hoberena lortu dugu,

berretsi du patronalekoak;

langileak «nahikoa da!» esan du,

eta bere kulturan letra larria adierazten duen

barrikadarekin idatzi du

bere protestaren lehen hitza.

w1996