BESTIARIOA

 

 

              I.

 

Hondartzan hezur bat

Uhinetan jostari,

Porotsu:

Ugaztunen aroa

Ez dator

Baikor.

 

Baleen kantuekiko

Soinu-banda dantzut

Kaskoan.

 

 

           II.

 

Nehoiz ez nauzu

Hain hartza izan

Elur gabeko

Negu peskizan.

 

Zure eskua

Nirean hartza.

 

 

         III.

 

Jin da arratsa

Gaur berehala:

Hurbildu zaigu

Zakur leiala.

 

Zaunkaz ari zen

Negarrez nola

Jabal ezinez

Minaren zola.

 

Gose zegoen

Lepoa zauriz

Ezti galdezka

Mila uhuriz.

 

Libertatea

Hain da garesti

Eta gozokiz

Ezin da bezti!

 

 

                  IV.

 

Haur denborako idi pareak

Oroitzen ditut noiztenka:

Hots emailetto ibiltzen nintzen,

Akuilua eskuetan

Eta idiak gibelean

Izerdi, lehertzear,

Urin haroan ulu saldoa,

Burrunbaz eta ziztakor!

 

Haur denborako idi pareak

Oroitzen ditut noiztenka:

Muturretako trinkoen hari

Zikinak tuaz bustirik,

Ildo ketsua usnatzen zuten

Tematsu, korrokaz,

Eta zizare bihur lodiak

Zebiltzan gutaz trufari...

 

Haur denborako idi pareak

Oroitzen ditut noiztenka,

Eta golde nabarrak urrikirik

Ez zuen denbora haiek.

 

 

       V.

 

Erleak

Azken hatsa

Eman du

Arrosaren

Bihotzean:

 

Erdia

Pozoatürik

Zeukan!

 

 

                     VI.

 

Gorputz hori ileak hankak lurrean

Zanpa-zanpa aitzina bidean

Astunki bizirik alde orotara so

           Niri so zuri so

           Bazterrei so

Malkorik gabe.

 

Gorputz hori ileak sabelpe larrutua

Atzera begira lanjerra nondik datorren

Zergatik hil behar zaitu ez badiozu

           Minik egiten

           Minik egiten

Marrurik gabe.

 

Gorputz hori ileak hezurrak zurbil

Harpe hutsetan gorde nahian bezala

Goseak gidatzen ditu zure urratsak

           Isil-isilik

           Negu-loaren menturaz

Aserik gabe.

 

Eta bat-batean zutitzen zara:

Animaleko gorputz hori ileak hankak

Besotzen zaizkizu, sabelpeak zabaltzen,

Bizkarrak zurubitzen,

           Zutitzean

           Ene miraila zara

Eta orduan ni naiz izaki tipil,

Ohiko larre motzetatik

           Haizatua,

Ene burua babestu beharrez

Lasterka hatsanka

           Auhenik gabe

           Ibilki.

 

 

                 VII.

 

Hire abere-laguna naun,

Errotan gora dabilen sagua

Eta nahi dunanean

Maitale sumitu

Bilakatzen dena.

 

Hire abere-laguna naun:

Hau ene destinoa baino

Ez dun.