Galdu

Memoria, hitza, udaberriko hatsa,

Galdu esperantza eta malenkonia,

Beldurra, ahalkea, amodioa

           Galdu,

Galdu bidea eta jakitatea,

Kaosaren ideia, zehaztasuna, zazpiko

Bihotza, zeruaren deia, botere

Nahikundea galdu, zerrendak egiteko

Mania, kidearen berotasuna,

Erretreten erreformako bataila

           Galdu,

           Galdu norberaren baitako

Haurraren dolorea, nortasun agiria,

Abandonua eta amaren soa, seiko

Urrea, oroitzapenak, otoitzak,

Txikitako infernuaren izua, intsentsu

Usaina eta hil-zeinuen joaldia,

Hire eskua galdu,

           Umearen irria, sabeletik odola,

Wifi seinalea, mediku hitzordua, topoa,

Uhinaren mehatxua, sexuren baten hezea,

Pobreziaren zilarra, Col.lapseren tenorea,

Utzikeria eta dolua

           Galdu,

           Burua apaltzeko joera,

Eguneko tao lezioa, lauko ordokia,

Norabide argia, etsimendu modernoa,

Ihesaren tentazioa

           Galdu,

Galdu herioaren mentura,

Maitasunaren balizkoa, elkartasunaren

Hiruko kemena

           Galdu, galdu, dena galdu

Eta eternitatea irabazi.