ARGITASUN BETEAREN
EHUNDURAK

 

 

Dansaneuko adiskideei,

esker onez

 

 

                       I.

 

           Argi-isuriak irentsi zaitu.

Portuan gora zatoz musikarik gabe.

Behiak eta larreak egarri daude.

Erraldoiak dira harriak,

Lehergarriak harkaitzetako plegu

Izugarriak, dolore tektonikoen

           Lekuko.

           Ur ona edan duzu

Bihurgunez bihurgune. Alta aho-sabaia

Idor dagokizu oraindik ere

Eta lur honen hiztegia osorik

Hurrupatuko zenuke.

 

           Eta gauaren erdian

Lepoa hausten duzu izarrei begira.

Geografiaren larderiatik aldendu zara.

Antzinako itsasoek gordetzen zutena

Distira dabil zeru beltzaren

Sakonean. Iluntasunari irri

           Egiten diozu:

           Humanitatearen

Altxorrean zaude, zure bizitzan

Hirugarrenekoz.

 

 

                             II.

 

Eguna altxatzen da zohar, gailurrak zurituz.

Lainoak ere hor daude Son aldean zelatari

Eta kerubinen begi askoak geroaz galdeka:

Ez dut galduko eskua.

Ez dut galduko bidea.

Nire baitako lengoaia arrotza

Galerna bat da.

 

Bonaigua portuan behera dator haize uherra.

Harrizko mamuak esnatzen dira eliz atarietan.

Isil-isilik nago eta gaur gure eguna izanen da:

Ez naiz jausiko berriro.

Ez naiz jausiko sekula.

Nire baitako infernuen suak

Ikatz egingo zaitu.

 

Diozu: hemen erre zuten lehen sorgina.

Zeure burua estimatzen jakin beharko zenuke.

Iraganeko bihotzek izu kolpeka jotzen dute.

Ez dut etsiko: hor zara.

Ez dut etsiko, jakizu.

Nire baitako desio ubel aseezinak

Klikatuko gaitu.

 

 

             III.

 

Mundutik urrun

Baina munduaren zilbor

Korapilatsuan

           Nago zutik

Monasterio eroriaren

Erdian.

 

Harri meta baten

Gainean jarriko naiz

Idazteko

           Hiru absideetatik

Batean ene antsia

Gordetzeko.

 

Hamaikak dira

Hamaikagarren mendeko

Egoitza isilean

           Txoriak eta

Ulu beltzak orroaz

Haize apur batekin.

 

Ehunka olerkarik

Nabaritu zuen

           Hemen

           Nik gaur

Dastatzen dudan

Harrien bakea.

 

Erabaki dut, hor,

Eremita harpearen parean

Gabetasuna maite zuten

           Anakoreta haien

Antzera bizitzen

Saiatzea.

 

Eta noizbait hiltzen

Banaiz heda ditzatela

Ene errautsak

           Sant Pere del Burgaleko

Monasterioaren inguru

Mineral hauetan.

 

Bitartean

Zazpi hostoekiko haritz

Abartxo bat

           Bildu dut,

           Lur honetako

Itzaletan betirako errotzen

Naizenaren ikur.

 

*

 

           Indar isila.

Hormen bakartasuna.

Lux Mundi epikoa.

Soaren jatorria.

 

           Nola aitor

Zenbat maite dudan

El romànic català

Deitzen duten

Eliza-estiloa.

 

           Maite dut

El romànic català

Ni ere estilo

Horretakoa

Naizelako.

 

 

                 IV.

 

Gorputzak geruza mineralen

Moduan plegatzen dira

Taula gainetan.

           Bat-batean lagunak

Aldamenean hip-hop dantza

Mugimenduak egiten ditu.

           Adinak ez du

           Muntarik,

           Muntarik ez du

           Adinak.

 

Oheko zetazko mihiseak oro

Plegatzen dira gauean

Auhen eta intziri.

           Aztiaren xuxurla

Entzun da TikTok film

Baten luzeran:

           El meu clítoris

           És fantàstic,

           Fantàstic és

           El clítoris meu.

 

Dena erran daitekeen mintzaira

Dabil bidaidearen ezpainetan

Etengabean eske.

           Eskuzabaltasunaren

Gramatika harilkatzen

Dute eguneroko

           Hitzek, aditzek

           Eta hiztegiek

           Gatiba ez

           Ditzaketen

           Plazer

           Putzuek.

 

 

                                 V.

 

Hartz erakusleak, amets ehiztariak, igarle kalakariak

Elkarrekin mintzo dira Whatsappez

Auñamendi katearen buru batetik bestera.

 

           Anarik egokitzen du Raimonen

Jo vinc d’un silenci antic

I molt llarg

           Eta orduan

Plaka tektonikoak bulkari dabiltza

Bihotz magmatiko etsiak jotzeari ekiten dio

Isiltasuna aipatzean begiak bustitzen zaizkigu

Zinominoak irri herabe bihurtzen dira

Herioaren espektroa urruntzen doakigu

Iragana lausotzen da eta

Izenik ez duen garai berri bat zabaltzen:

 

Hartz erakusleak, amets ehiztariak, igarle kalakariak,

Bizkarra makurtzen dugu, itzalak galtzen ditugu,

Baina hemen gaude,

           Auñamendiko.

 

 

              VI.

 

A Carles Porta,

el meu professor

de català

 

 

           Ikasi

Hizkuntza bat, elerik ele,

Tor non dagoen

Jakiteraino.

Gure mendietako

Misterioak

Kontrabando bideetan

Bilbatzen dira

Eta bi anaia

Pataskan ari lur puska

Batengatik.

 

Ez naiz etxea uztearen

Krimenaren

Susmagarri bakarra:

Banan-banan joan ziren

Guztiak

Etorkizun hobeago

Baten ametsez.

 

Eta ni, engoitik,

Hizkuntza bat ikasten, elerik

Ele, hain bakarrik,

Galdua, haran

Eta ur-geldoen artean,

Gure aitzinekoen

Etorkizun hobeago baten

Ametsak egiaztatzera

Eta unatu arte ibiltzera

Kondenatua.

 

 

              VII.

 

Ez onartu ezer

Onartzea aholkatu dizutelako

Edo zergatiko galderarik

Egin gabe.

 

Ez beldurtu

Denbora ahituko zaizulako

Beti egongo baitira

Goiz nabarreko

Orduak.

 

Geriza itzazu

Zure inguruko jendeak

Itsasoak eta lurrak

Adiskideak ere sekulako

Direla sinetsiz.

 

Sekulako geldi dadila

Sant Pere del Burgaleko

Haritz abartxo hau

Azken erabakion

           Jakile.