HIRU POEMA BIDEKO

 

 

Lurren barnealdea

hustua izan da.

Joséphine Bacon

 

 

                        I.

 

Ez dakit beti nondik natorren.

Ibiltzearen bortxaz aztalpean min dut.

Zure bila nabil.

 

Hitzik ez daukat jadanik.

Itzulpena debekatua da plazer lizun

Hobenduna balitz bezala,

           Engainua eta traizioa.

 

Haurtzaroa ez da dioten paradisua.

Larre motzak zitaldu dituzte. Zaborrez

Emokatuak dira gure bihotzak,

           Ni naiz maite ez dudan

           Etsai bakarra.

 

Bideari lotuko natzaio berriz.

Kanta zahar batek urratsa markatuko dit.

Bizi eta herio istorio latz bat.

           Amak erran du: negarrik ez...

 

Ez dakit sekula nora noan.

 

 

II.

 

Lehuntze, Basusarri eta Oragarre

Usurbil, Goizueta, Arguedas, Lizarra

Oiartzun, Iruñea, Elx, Eiheralarre

Arruta, Elizondo, Baiona, Lakarra.

 

Hernani, Ereñozu, Bilbo, Isturitze

Gasteiz, Donapaleu, Angelu, Zangoza

Arralde, Balmaseda, Senpere, Miarritze

Atharratze, Mutriku, Durango, Arrosa.

 

Zegama, Ondarroa, Bermeo, Baigorri

Agurain, Itsasu, Karrantza, Orio

Banka, Otsagabia eta Mendillorri

 

Larraine, Bidankoze, Ilharre, Bakio

Azkoitia, Arbizu, Lastur eta Orhi

Barkoxe, Sara, Ea, Altzai, Elorrio...

 

 

                               III.

 

Iluna urratzen dute aurpegirik ez duten mamuek.

Begi zuloak idor. Eskuak hezur,

Urkatzeko prest.

Herriak huts. Etxeak galmen,

Desagertzeko prest.

 

Ilargirik gabeko ordu txikietan ingumak

Iratzartzen dira, izan zirenak eta gu ginenak

Saltsa berean malaskatuz:

Eleaniztunak ginen eta orain

Mutxi gabiltza.

 

Ez zara hor. Itzala baino ez naiz, doi-doia argitzen

Duen lanpara abandonatua:

Mintzairaren baitako mintzoak

Entzuten ditut

Murmur

Sehaska kantak harilkatu nahian,

Desagertzeko prest.

 

Izate adamikoa naizen aldetik

Ez naiz garbia,

Izenak eta izanak batzen ditut

Eta hori

           Gauez gertatzen da ardurenean.