TOPO GELTOKIKO KOPLAK
HERRI URRATS BEZPERAN

 

 

             I.

 

Yolanda, Irantzu

eta Hedoirentzat

 

Etorriko da eguna

Denok espero duguna:

Goizeko izar haguna

Izango dugu laguna!

 

Kafe hutsaren kilika

Garunean ausikika:

Banabil aharrausika

Jasoz elektro-musika.

 

Biharra dugu hizpide

Katakraken adiskide,

Ezezaguna haurride

Eta gauerdia bide.

 

 

             II.

 

Harri xuria bidean:

Ez dakizu nora joan,

Arrastiri-min hilean

Elorri duzu gogoan.

 

Sakelaren sakonetik

Ateratzen duzu karta,

Entzunez leku onetik

Jendetzaren zalaparta.

 

Eskua duzu luzatzen

Agurra emateko maiz:

Irriak ez du uxatzen

Ahitu denbora araiz.

 

Laino eta euriteak

Maitatuko ditut beti,

Itzalka lauzen jiteak,

Radigue eta Ligeti.

 

 

             III.

 

Eguerdi eta hamabi

Hendaiako geltokian,

Lau andre eta ama bi

Irri marrak bekokian.

 

Bachen soinuen dirdira

Udako goiz beroetan:

Erranak etzaten dira

Kaier honen lerroetan.

 

Hitzaren haro epela,

Denbora soilen axola,

Geltokia hantzen dela

Pazientzia eskola...

 

Badator bizi urria

Karakoilen abiaduran,

Gogoeten hazkurria

Bele aseen menturan.

 

Zabaldu dute hesia,

Guziak gara ibiltzen:

Geltokiko poesia

Ez da sekula isiltzen.