STAYING ALIVE

 

 

Iruneko Ibis hotelean

 

 

                                  I.

 

Euria ari du: ipar haizearekin batera kantari dabil.

Gosariko gelan ekialdeko garraiolariak —batzuek beso

Aitzin tatuatuak dituzte, besteek hipster bizarrak—,

Neguko turista familia nuklearrak eta ni bezalako

           Bakartiak,

Pello Lizarralderen nobelaren bateko

Azkorriko giro uherreko

Argitasun grisean itoak:

           Bakartiak

           Isiltasunik handienean.

 

Euria ari du: itsaso aldetik datozen su-mihi

Urdinkarak zilar egiten ditu lainoak. Emigranteak

Autobus geltokietako aterpeetan daude elkarren

Berotasunaz elikatzen eta ni bezalako

           Bakartiak,

Pello Lizarralderen nobelaren bateko

Pertsonaiak bagina bezala,

Itzal eta ilun artean:

           Bakartiak

           Karrika hutsean noraez.

 

Euria ari du: Bidasoa aldeko kontsortzioko hiriak

Troxatzen ditu hezetasun hunkigarri horrek. Exiliatuak

Oro jadanik Unamunoren urratsetatik abiatzen dira

Gaua pasatzeko leku bila eta ni bezalako

           Bakartiak,

Pello Lizarralderen nobelaren bateko

Espektro urrumatsuen saihetsean,

Hau guzia zertarako den galdezka:

           Bakartiak

           Epopeia umilok idazten.

 

 

             II.

 

Hondarribitik ikusten

Da Txingudiko badia

Zeruko euriaz husten

Itsas grisaren habia.

 

Irun azaldu da berriz

Ateri bulta batean

Eta beltz bat eske irriz

Hor Alcampoko atean.

 

Hendaia ez dago urrun:

Denek dugu pasatuko

Frontera gorria zurrun,

Lotsari eginez uko…

 

Lur hobe baten ametsa

Badabil neguan dudan,

Esperantzaren kiretsa

Halaber bizirik mugan.

 

 

                         III.

 

Ez duzu negarrik egin

Etxea eta iragana gibelean utzi dituzunean

Egun oroz horrela da

Zure nortasun puskak galtzen dituzu

Itzulerarik gabe:

           Ez duzu negarrik egin.

 

Ez duzu oihurik bota

Lan orduetan zirika latza jasan duzunean

Egun oroz horrela da

Etengabe apalesten zaituzte

Errespeturik gabe:

           Ez duzu oihurik bota.

 

Ez duzu nehor aurkitu

Esku hutsik eta bidez bide abiatu zarenean

Egun oroz horrela da

Zain hantuak eta hiztegiak husten dira

Erranahi zehatzik gabe:

           Ez duzu nehor aurkitu…