LIED FÜR ANDERS

Egarria sortzen duten edariak

Eta aserik ez dakarten janariak

Irensten ditugu azken

Beltzaren beltzean:

           Nork lehortuko ditu

Etorkizunaren negarrak?

Itsasoa hilotzez estaltzen da

Eta portuak ixten dizkiete unatuak

Haragizko uhin-mendi beltzak

Gaindituz heltzen direnei:

           Nork lehortuko ditu

Etorkizunaren negarrak?

Hormaren maldara iritsi gara.

Ostadarrak margultzen direnean

Ke beltzek eta erre usainek

Itotzen gaituzte:

           Nork lehortuko ditu

Etorkizunaren negarrak?

Gure begipean zerbaitek

Hartzen du behialako munduaren

Jabegoa, aldi berean aberats

Herrikoi eta beltz kaki:

           Nork lehortuko ditu

Etorkizunaren negarrak?

Pertseidak zeruan zehazten saiatuz

Gutxiagorekin hobe dela diozu

Hasperen batean

Eta bilobaren eskua hartzen duzu:

           Nork lehortuko ditu

Etorkizunaren negarrak?