INOZENTEAK

Abortua ez baitzen libre

Pilula oraindik asmatu ez

Kondoia nola erabili ez jakin

Jaio eta segituan amaren tititik kendu

“amesgaizto bat izan dun; bertzerik ez”

eta zaku itxietan preso

San Migel zubitik beheiti

putzura bota zintuztegun

Hainbertze

kattakume

eta xakurkume

Inongo haize zirimolak

ez zuen sekula

inolaz ere erauziko

zuen esne usaina

ama dohakabe haien gogotik

Baina guk orduan

ez genituen aditzen

zuen auria intziri marraska isilak

ur nagien azalean

lerratzen

Txingudiko badiaraino

Nongo zerutan bizi ote zarete?