ZINEZKO GURASOAK

(Gerora aita izan nuenak,

aita Mañuelek,

egia eta fedea erraten bazuen

sasi artean aurkitu ninduela,

zinezko nire gurasoak

honako bertze hauek

izan nituela amestu nik)

Ama nuen ekilibrista

egundainoko artista

ezpainak musker begiak more

mototsean bi lore

lurrean salto eta iraulka

Ez baita inoiz itzuliko

hementxe esperoan nauka

Aita nuen domadore

izan ez balitz hobe

eskuan tinko uztaia

zirkuko izar; domaia

deboratu zuen hartzak

Ehortzi zuten landa-zelaian

fruituak beti garratzak

Utzi ninduten sasian

erabaki gozo-gazian

haiek izateko libre

akort nengoen ni ere

Eta hantxe gelditu nintzen

aurkitu ninduten arte

masusta gorriak biltzen