ERRETZEARI UTZI

Erretzeari utzi behar diot holako egunen batean

zure suteetan erretzeari esan nahi dut, izarek gero

izerdi hotza eragiten baitidate, ospitaleko pasilloan

ebakuntzaren baten zain itxaroten banengo legez.

Ez zaitut maite-eta, badakizu, maite ez zaitudala

esatea, erretzeari, tabakoa erretzeari nahi dut esan,

hori esatea, ez zaitut maite, tabakoari uztea baino

askoz gaitzagoa da, gaitza, maite zaitut lehenengoz

esatea baino askoz ere gaitzagoa, malkoak eta

ez dira-eta izango maite zaitut lehenengoz esatean

izan                                                            zirenak.

Ez zaitut maite, gero zure besoetan erretzen banaiz ere.

Tabakoa erretzeari utzi beharko diot ba, ea ausartzen

naizen ez zaitut maite esaten eta zure besoetan erretzeari

uzten diodan, ez daitezen izarak gero nire izerdi hotzaz

busti, ez dezazun esan, zer duzu, maitea, eta ezer ez, nik,

gauari aurre egiteko zigarroa isiotzen dudan aldi berean.

Erretzeari utzi beharko zenioke, diostazu orduan eta bai

erantzun nik, esan beharrean, bai, erretzeari utziko diot,

                                                                ez zaitut maite,

larruaren errearen ostean

ospitaleko pasilloan ebakuntzaren zain banengo legez

sentitzen naiz. Ez dakit ulertuko zenukeen suaren ondoko

nire izerdi hotza. Zelan ba, maitea, erretzeari utzi.