Haragizko amoreak
Haragizko amoreak
2010, poesia
88 orrialde
978-84-92468-17-1
azala: Joseba Barrenetxea
Edorta Jimenez
1953, Mundaka
 
2006, kronika
2003, nobela
2003, saiakera
2001, poesia
1993, nobela
1991, nobela
1990, ipuinak
1987, poesia
1986, poesia
1986, poesia
1985, poesia
 

 

IPUINETAKOA

 

Zapata bustiak kendu barik

halaxe etorri ohi zinen

                                  Cinderella

printze zitalen konpainiatik:

gau-zuloetako dantzaldiak amaituta

hamabiak aspaldi jota

                            umezurtz

                                      atean deika.

 

Ilean euri fin izandakoaren kea

birikietan belarraren errea

irina sudur errotetan ehota

eldarnioz begi ikatz ederrak

odolean alkoholaren gardena

hortzetan nerabe galduaren barrea:

ostatu eskatzen zenidan

                                    Cincenta

psiko-alkimia guztien jabea.

 

Rimbaud Parisen bezain hordi

nire gorputzean galtzen zinen

                                              Cendrillon

labirintoan hegoaren bila

                                      etsipenez

erruduntasun barik nire isuria

adatsean azalean denean

halaxe hartzen zintuen loak

semenaz ase

ezin bestela

                  Cenerentola.

 

Hordien Ontzia izaretan topaturik

nabigazioari ekiten zenion

                                        Cenicienta

eta munduko ipuinetako mamuak

etorri bide zitzaizkizun

ozen egiten zenien-eta berba

                                            lo-edo

endelegatzen ez nituenak esanez

zure adats eder pre-rafaelistak

nire larruazalean laku ilunarena

egiten zuelarik

oi alkimiaren maistra.

 

Erdi itzarrik eta jagi orduko

gaueko labirintoaren atea bilatzen zenuen

berriro nire larruazalean

eta ni zure lakuko ur ilunetatik irten ezinik

plazerez irato ohi ninduzun.

 

Zapata bustiak ordurako lehorturik

gosaltzeko ezer hartu barik abiatzen zinen

belar hordigarriaren kea berriro birikietara bidean

izaretan errauts fina utzita

eta errautsetan galduta

                                  tanga

lehoinabar larruaren airekoa gehienetan

        Errauskine

                        Cinderella

                                        Cincenta

                                                      Cendrillon

                        Cenerentola

                                        Cenicienta

                                                      ipuinetakoa.