NINFA ASKEAK

Eta Graziana Barrenetxeak, akelarreko erreginak,

zera dio, haren [apoaren] usaina...

        Zugarramurdiko jendeei egin sorginkeria-auzia

        Logroño, 1610eko azaroa

Horko aterpe itzaltsuan, kolegiotik ez hain urrun

askeak diren Ninfek Lesbos basokoak dituzte

beren artean saiatzen, elkarren biloetan laztanka

bilatuz sagarraren azukre errea, gerezien azal gorria eta

                            okarana,

non den eurek dakiten, beste inork ez dakien

                            okarana.

Halaxe ote ziren ba Graziana, larreak, landak eta

zelaiak zeuen barreez bete, Graziana, elkarren

besoetan jausiz eta bilatuz eta listu laztanez igurtziz

                            okarana,

errearen gorriena den haragizko okarana,

                            Graziana.