BEHARRA ETA LANA

Ni lehen idazlea nintzen.

Apartamentu bat neukan arrakastaren errebaleko

auzune batean.

Eskua ipurdi borobilen

eta bular konikoen gainean jarrita

egiten nuen lo.

Pobrea eta duina nintzen.

Argitaratu nituen liburuek arrakasta handia izan zuten

lagun minen artean.

Urte batzuk geroago bularrak apur bat obalatuago zeuden

eta ni apur bat nekatuago

eta merkataritzari ekin nion.

Pisu bat daukat konformismoaren

kale zentrikoenean.

Ez doakit txarto.

Funtsean lan berbera da.

Begira ezazu kaxa horien barrura:

hori da jendeari okela dela esanez

saldu behar diodana.