Hiria gorroto dudanean

opresiboegia delako edo hilerria

ematen duelako

edo umore txarrean jaiki naizelako

ez dut epidemiarik

uholderik ez suterik eskatzen.

Landareetan jartzen dut nire

itxaropen sendoena.

Apurka-apurka kaleak hartuko dituztela pentsatzea

atsegin dut

eta guri ez zaigula men egitea baino

geratuko.

Zuhaitzak txoriz betetako

arrain-ontziak izango dira.

Eltxoak odol tanta hegalariak.

Lurra ukitu bezain laster lurrunduko gara seguruenik

baina bitartean barre egingo dugu

eta gaztainondoaren sustraiez eginiko giltzak

beharko dira

etxeetara sartu ahal izateko.