2. Zer da Simplicissimus?

 

(Kanta hasiko da.)

 

FINCK:

      Andreak, hau da gure asmoa:

      giza kontzientzia indartzea.

      Bakarrik inporta zaigu

      justizia eta libertatea.

      Beraz, zuek orain ez etorri

      ganorabako barre baboaz.

      Ez dugu maite publiko

      inozo eta sinsorgoa.

 

      Ez genuke inoiz onartuko

      umore erraza egitea.

      Ez zaigu interesatzen

      alienazioa elikatzea.

      Beraz, mesedez, entzun arretaz

      seriotasun eta larritasunez:

      gure ikusle faboritoa da

      jakintsu eta ganorazkoa.

 

(Kanta bukatu da.)

 

FINCK: Hau da gure plana. Gustatu ala ez.

 

KORISTA 1: Gustukoa dugu! Nork ez du aspertzea maite?

 

KORISTA 2: Ados nago kanta horrekin, baldin eta hitzak lekuz aldatzen baditugu.

 

(Kanta hasiko da berriro.)

 

FINCK: Andreak, hau da gure asmoa:

 

KORISTA 1 eta KORISTA 2: umore erraza egitea.

 

FINCK: Bakarrik inporta zaigu

 

KORISTA 1 eta KORISTA 2: alienazioa elikatzea.

 

FINCK: Beraz, zuek orain ez etorri

 

KORISTA 1 eta KORISTA 2: seriotasun eta larritasunez,

 

FINCK: ikusle modelikoa

 

KORISTA 1 eta KORISTA 2: inozo eta sinsorgoa da.

 

FINCK: Ez genuke inoiz onartuko

 

KORISTA 1 eta KORISTA 2: giza kontzientzia indartzea.

 

FINCK: Ez zaigu interesatzen

 

KORISTA 1 eta KORISTA 2: justizia eta libertatea.

 

FINCK: Beraz, mesedez, entzun arretaz

 

KORISTA 1 eta KORISTA 2: ganorabako barre baboaz.

 

FINCK: Ez dugu maite publiko

 

KORISTA 1 eta KORISTA 2: jakintsu eta ganorazkoa.

 

(Kanta bukatu da.)

 

KORISTA 1: Ongi etorriak, beraz, Simplicissimus-era.

 

KORISTA 2: Sinpletasunaren erreinua.

 

KORISTA 1: Arazoak bazterrean utziko ditugu.

 

KORISTA 2: Kezka guztiak ahaztu.

 

KORISTA 1: Gure kontzientziak anestesiatu. Hor kanpoan zelatan dagoen errealitatearen ateak itxi…

 

KORISTA 2: …eta istant batez zoriontsuak garela sinistu.

 

KORISTA 1: Umeen moduan barre egin.

 

KORISTA 2: Umeen moduan pentsatu. Erreparatu gabe hor kanpoan mundua erortzen ari dela.

 

KORISTA 1: Erremediorik gabe!

 

FINCK: Horretara etorri gara, eta guztiz kontrakoa egitera ere.

 

KORISTA 2: Izan ere, kabaretean, hitzak haizeak eramaten ditu.

 

KORISTA 1: Eta zuri-beltza zena beltzuri bihurtzen da.

 

(Kantuan, hirurak.)

 

FINCK: Andreak, hau da gure asmoa:

 

KORISTA 1: giza kontzientzia indartzea.

 

KORISTA 2: Edo akaso umore erraza egitea!

 

FINCK: Bakarrik inporta zaigu

 

KORISTA 2: justizia eta libertatea.

 

KORISTA 1: Edo agian alienazioa elikatzea?

 

FINCK: Beraz, mesedez, entzun arretaz,

 

KORISTA 1: seriotasun eta larritasunez.

 

KORISTA 2: Eta zergatik ez ganora gabeko barre baboaz?

 

FINCK: Gure ikusle faboritoa da

 

KORISTA 2: inozo eta sinsorgoa.

 

DENAK: Eta hala ere

      gure ikusle faboritoa da

      jakintsu eta ganorazkoa!