1. Aurkezpena

 

(Gortinen atzetik kabareteko aurkezlea agertzen da, werner finck. Benetako Werner Finck gizonezkoa bazen ere, emakume batek antzezten du.)

 

FINCK: Andre maiteok, gabon eta ongi etorriak Simplicissimus kabaretera. Gau honetan…

 

(Publiko artean dagoen pertsonaia batek eteten du bere jarduna. Itxura androgino eta estrafalarioa duen korista bat da.)

 

KORISTA 1: …jakinarazten dizuegu guretzat umorea oso inportantea dela.

 

(bigarren korista androgino bat agertzen da publiko artetik.)

 

KORISTA 2: Seriotasunak tristatzen gaitu.

 

KORISTA 1: Sakontasunak kikiltzen gaitu.

 

KORISTA 2: Bizitzaren sentipen tragikoak deprimitzen gaitu.

 

KORISTA 1: Beraz, dena serio hartzen duten horietakoa bazara, badakizu atea non dagoen.

 

KORISTA 2: Zorigaiztokoak…

 

KORISTA 1: …ozpindutakoak…

 

KORISTA 2: …erretxinduak…

 

KORISTA 1: …umore txarrekoak…

 

KORISTA 2: …ihes egiteko garaiz zaudete oraindik.

 

FINCK: Aizue, mesedez…

 

KORISTA 2: Eta gogoratu: antolatzaileek sari potoloak eskainiko dizkiete gehien dibertitzen diren ikusleei.

 

FINCK: Hori ez da egia!

 

KORISTA 1: Bost punturekin sarituko da barre algara ozena.

 

KORISTA 2: Lau punturekin barre sanoa.

 

KORISTA 1: Hirurekin txalo zaparrada beroa.

 

KORISTA 2: Birekin irribarre xaloa.

 

KORISTA 1: Eta puntu bakarrarekin…

 

KORISTA 2: …onespen keinu apala.

 

FINCK: Funtsean esan nahi dutena zera da…

 

KORISTA 2: Kontuz!

 

KORISTA 1: Ez dugu mutur beltzik nahi!

 

KORISTA 2: Tentu ibili!

 

KORISTA 1: Haserretuko gara bestela!

 

FINCK: Nire ustez, ikusleak askatasun osoa du…

 

KORISTA 2: Ikusleak askatasuna bere etxean izango du, zorte ona badu. Hemen umorearen diktadurapean dago.

 

KORISTA 1: Dibertitu ala hil!

 

FINCK: Hara, mesedez ez gaizki ulertu. Gu ez gara friboloak…

 

KORISTA 2: Bagara friboloak.

 

FINCK: Ados. Friboloak bai, baina ez buruarinak.

 

KORISTA 1: Buruarinak ere bai.

 

FINCK: Ondo da, fribolo eta buruarinak, bai, baina ez inozoak.

 

KORISTA 2: Intelektuala deitu didazu???

 

FINCK: Ez, inola ere ez! Friboloak gara, buruarinak eta inozoak. Baina inork ez du esango ganorabakoak garenik.

 

KORISTA 1: Ba nik zin dagit ganorabako hutsak garela!

 

KORISTA 2: Ados nago zurekin.

 

FINCK: Ongi da. Friboloak gara, buruarinak, inozoak eta ganorabakoak. Baina ez gaude alienaturik.

 

KORISTA 2: Apur bat bakarrik.

 

FINCK: Eta kontzientzia sozial irmoa daukagu.

 

KORISTA 2: Gutxi gorabehera.

 

FINCK: Eta sinisten dugu umorea tresna bikaina dela…

 

KORISTA 2 eta KORISTA 1: …zertarako?

 

FINCK: Ba… Transgresiorako?

 

(Barre egiten diote.)

 

KORISTA 2: Transgresioa?

 

(koristek barre egiten dute.)

 

FINCK: Umoreak gizarte burgesaren zutabeak koloka jartzen ditu.

 

KORISTA 1: Ez zutabe guztiak.

 

KORISTA 2: Eta ez gizarte burges osoa.

 

FINCK: Ados. Baina ez didazue ukatuko umore inteligenteak min egiten diola botereari.

 

KORISTA 1: Esaldi horri buelta eman ahal zaio.

 

KORISTA 2: Batzuetan, umoreak inteligentziari min emateko boterea dauka.

 

FINCK (publikoari): Simplicissimus kabaretean umore kritiko eta soziala lantzen dugu. Gau honetan…