BIHARAMUNA

Eguzkiaren ondoren, damua.

Damuaren ondoren, eguzkia berriro.

Yannis Ritsos

Aurreko gauean gertatu zena

argitu nahian hartu genuen lo atzo

uda amaieraren zaporea ahoan

nagi minez aritzeko

erdi biluzik elkarren bila

ametsetan ere

distantzia berera zinen

belaze zabal batean

jatekoa eta jendea

han-hemen

norbera bere buruaz barrez

bakoitza bere lagun minekin

goizaldera

esnatu ginenean

eguzkia aurkitu genuen

logela zeharkatzen

nola izotz gaineko dantzari bat

lurreko itzal putzuetan

irristatzen

leihoa zabaldu eta

ez zen inor ikusten

saia gintezkeen berriz.