Gu gabe ere
Gu gabe ere
2021, poesia
96 orrialde
978-84-17051-79-2
Azaleko irudia: Nagore Legarreta
Itziar Ugarte Irizar
1995, Oņati
 
 

 

ETERNITATEA

 

 

Film erdi melodramatiko bat zen

eta hala ere kolpetik eten dit arnasa

maitaleak ito aurretik idatzitakoa

irakurri duenean protagonistak

herritarrez betetako hileta elizkizunean:

 

            istant bat izan naiz ni zuretzat

            zu, ordea, nire eternitatea.

 

Militar batek idatzitako hitzak ziren

azken paper puska lehorrean

itsaspeko nuklear errusiarra gutxika

urez bete bitartean, Barents itsasoan

 

—zer gelditzen da kontatzeko

ura atzera gabe datorrenean—.

 

Negar egin badut ez da izan

andrearen gaztetasunagatik

are bakartiago hazi beharreko

bien semearengatik

 

            segi bizitzen

            saiatu zoriontsu izaten

 

egin dut jabetzean horretan ari direla

kalean gurutzatzen ditudan zenbait

ez daudenen eternitatea haragitzen

baina haiek, ordea, hemen

 

egunak egunekin erretzen

irakurri gabe tolestutako

egunkari dorreen eran.