AITAREN KANTUAK

Save your illusions.

Robyn Hitchcock

Bere gitarren hotsa

entzun zitekeen

ganbaratik behera

neguko arratsaldeetan

bibrazio bat

eskaileran

talde ugari etxekotu dizkit

ikusi ditugu elkarrekin

baina bada igo ezin dudan

horma bat

bere kantuen mundura

ez dakit zeinek ezarria

ez dakit zer babesteko

ibiltzera atera naiz

bere Ipoda hartuta

—etxekoak loarinean—

eta orduan entzun dut kantuan

10.634 pisten artean

—hain larri beti tonu altuetan—

nire zortzi urteko ahotsa

beste grabazio baten erdian

partekatu dugu

melodietarako izpiak non bildu

hizkuntza nola limurtu

baina iheskor bihurtzen zaizkigu keinuak

eta urrats erdiak atzera hasten gara

elkarrengandik arrotz zaiguna

bere horretan

nork bere hormaren aldean

dantza baldarrean utziz.